Entrega en Candás de los Premios de l'Asociación pa la Recuperación de la Pita Pinta

Gracies a una iniciativia de l’Asociación pa la Recuperación de la Pita Pinta Asturiana, en collaboración col Serviciu de Normalización Llingüística de la Mancomunidá d’El Cabu Peñes y los maestros y maestres d’asturianu, la Pita Pinta asturiana tuvo’l so espaciu nes escueles de Carreño y Gozón y los neños y neñes d’estos centros pudieron participar del nacimientu de los nuevos “pitinos y pitines” que nacieron y tán naciendo nes mesmes escueles.
Col proyectu “Pon una incubadora na to escuela”, los rapacinos y rapacines de los dos conceyos, gociaron del fechu de poder ver desarrollase – col usu d’un oboscopiu -  nacer  y espolletar una nueva xeneración de pitos y pites de delles variedaes (negra, blanca, roxa y abedul) d’esta raza autóctona asturiana en peligru d’estinción.

La idea partió d’una esposición d’esti animal, que se complementó con esta actividá y con un certame de cuentos  “La pita pinta cacarexa n’asturianu”.
Esti proyectu yá pasó per toles escueles de Carreño pa dir agora pa les de Gozón, y l’ésitu foi talu, que más escueles d’Asturies y de fuera, quieren sumase a esta iniciativa de protección y difusión d’esta raza autóctona asturiana.
La entrega premios del certame va facese pal vienres 28 de marzu nel Polivalente “La Baragaña” en Candás a les 12:00 hores. Los neños y neñes que nun pudieren asistir por delles razones, el propiu Serviciu de Normalización xunto col presidente de l’asociación van acercase a les escueles pa dar a tolos y toles participantes (unos 200) un diploma pola so implicación. Amás, va contase cola asistencia de la Directora Xeneral de Política Llingüística, d’una persona en representación de l’Academia de la Llingua Asturiana y de los propios Conceyos.
Esti tipu actividaes demuestra que lo novedoso, lo diferente, garantiza l’ésitu del trabayu fechu y ye un referente pa dar puxu y dar a conocer lo de nós fuera de les nuestres fronteres.

Fuente: Nota de prensa del Serviciu de Normalización llingüística de la Mancomunidá d'el Cabu Peñes.

No hay comentarios:

Nuestro Facebook: Carreño Actualidad